Valborg Anna Ólafsdóttir, formaður Miðflokksins í Mosfellsbæ, lýsir áhyggjum sínum á heilbrigðiskerfinu í grein sem hún skrifar í Morgunblaðið í dag.
Hún segir að hún hafi farið í þrjár krossbandsaðgerðir eftir að hafa lent í slysi 15 ára gömul, en eftir þær hafi verið þörf á liðskiptaaðgerð. Læknir Valborgar sagði henni þó að biðin eftir aðgerð á Landspítalanum væri of löng og það besta í stöðunni væri að fá spelku frá stoðtækjafyrirtækinu Össuri.
Eftir að hafa fengið spelkuna sem var niðurgreidd af ríkinu lýsir valborg ömurlegum tímum „Helgarnar fóru í það að liggja upp í sófa og finna þunglyndið banka að dyrum. Ég gat svo lítið gert,“
Valborg bað þá heimilislækninn sinn um að skrá sig á biðlista hjá Landspítalanum.
„Eftir nokkrar vikur með spelkuna og á þrjóskunni einni saman, spelku sem gerði akkúrat ekki neitt, festist hnéð þegar ég var úti í búð að versla“ segir Valborg sem gat ekki gengið þegar hingað er komið við sögu.
Þá var Valborgu bent á að hafa samband við Hjálmar hjá Klíníkinni, sem hún og gerði. Hjálmar hafði starfað við liðskiptiaðgerðir í Svíþjóð um árabil og var nýkominn til landsins.
Valborgu biðu tveir valkostir: að bíða í minnsta lagi í sex mánuði eftir að fá niðurgreidda aðgerð hjá Landspítalanum eða fara í aðgerð hjá Hjálmari og borga fúlgur fjár fyrir.
„Ég hugsaði málið og ákvað að hringja í Hjálmar og segja að þetta væri ekki boðlegt, ég yrði að komast í aðgerð eða andlega heilsan myndi að fullu gefa sig,“
„Ég ræddi við bankastjórann minn, fékk lán og veðsetti íbúðina mína fyrir aðgerðinni,“ sagði Valborg og bætir við „Greiddi sjálf fyrir aðgerðina. Ég, sjúkratryggði Íslendingurinn,“
Valborg sér ekki eftir aðgerðinni sem heppnaðist vel, hún segist geta allt sem hana langi til og vera dugleg að hreyfa sig. Hún segist þó sakna 1.200.000 krónanna sem þurfti að borga fyrir aðgerðina og vonast til að fá endurgreitt einn daginn.
Valborg þakkar Hjálmari og Klíníkinni sérstaklega fyrir að standa við bakið á henni í bataferlinu.
„Þetta er gjörsamlega galið!“ skrifar Valborg að lokum, en þar á hún við að heilbrigðisráðherra vilji ekki semja við Klíníkina og sendi frekar sjúklinga til Svíþjóðar.
Í seinasta mánuði tjáði Ísólfur Gylfi Pálmason sig um svipað mál, en hann fór einmitt til Svíþjóðar í mjaðmaaðgerð sem var niðurgreidd af ríkinu. Þrátt fyrir að aðgerð hjá Klíníkinni hefði kostað minna. Ísólfur bað þá ríkisstjórnina um að fresta þriðja orkupakkanum til að einbeita sér að þessum málefnum.