„Það kom aldrei dauð stund þar sem þögnin réði ríkjum. Þetta var yndisleg bílferð og nærandi,“ segir Haukur Örn Birgisson, forseti Golfsambands Íslands og pistlahöfundur í Fréttablaðinu, í bakþönkum blaðsins í dag.
Þar fjallar Haukur um málefni sem er mörgum hugleikið um þessar mundir, örar tækniframfarir og stafræn samskipti.
„Það er frábært að mörgu leyti en hefur aukaverkanir, eins og margt annað. Í viðskiptum getur fólk fundað, skrifast á og jafnvel undirritað samninga í gegnum tölvubúnað. Þeir námfúsu geta nælt sér í heilu háskólagráðurnar án þess að stíga fæti inn í skólabyggingu og ástvinir geta viðhaldið tengslum þrátt fyrir að búa í sitthvoru heimshorninu,“ segir Haukur sem nefnir að á sama tíma og við nýtum okkur kosti stafrænna samskipta þá fer okkur aftur í mannlegum samskiptum.
„Við erum hætt að hittast jafn mikið og við gerðum. Tala saman. Tjáningin fer nú fram með þumlum, fýluköllum, hlægiköllum og emoji-táknum. Merking raunverulegra orða tapast í stafrænni þýðingu og svipbrigðin eru falin á bak við svarta spegla snjallsímanna.
Við glötum smátt og smátt hæfileikanum til þess að eiga spjall um ekki neitt, sem eru oft skemmtilegustu spjöllin. Þeir sem stunda heitu pottana eru reyndar öruggir með að halda í hæfileikann.“
Haukur segir svo á skemmtilegan hátt frá leigubílstjóra, Egill að nafni, sem hann hitti þegar hann ferðaðist að Keflavíkurflugvelli. Sá kunni heldur betur að spjalla og var raunar prófessor á því sviði, eins og Haukur segir.
„Bílstjórinn kunni spjalllistina betur en flestir og það var augljóst að samfélagsmiðlunum hefur ekki tekist að eyðileggja hann. Á hálftíma ferðalagi ræddi hann við mig um allt frá gagnaverum á Suðurnesjum til barnanna minna. Frá Íslendingasögunum til lélegrar lögfræðiþjónustu.“
Haukur segir að bílstjórinn hafi borið samræðurnar uppi enda viðurkennir Haukur að hann sjálfur búi stærstan hluta ársins í hinum stafræna heimi.
„Ég svaraði bara. Það kom aldrei dauð stund þar sem þögnin réði ríkjum. Þetta var yndisleg bílferð og nærandi. Hann Egill ætti að halda námskeið í spjalli fyrir okkur hin og námskeiðið ætti að vera skyldufag, sem því miður endar líklegast á því að vera kennt í fjarnámi.“