Stefán Hrafn Hagalín náði þessum skemmtilegu myndum í Laugardalnum um helgina. Þarna hefur hrafn einn komist í feitt, en hann sést á myndunum gæða sér á mávi. Hrafninn vissi greinilega vel að það er hollt fyrir meltinguna að skola niður matnum með íslensku kranavatni.
Stefán Hrafn deildi myndunum á Twitter þar sem hann líkir aðförum Hrafnsins við tíðindi helgarinnar þar sem Enska fótboltaliðið Manchester City tryggði sér Englandsmeistaratitilinn annað árið í röð, aðeins einu stigi fyrir ofan Liverpool.
„Fylgdist með hrafni gæða sér á mávi á vatnsbrunni í Laugardal áðan. Flaug með hræið þangað, bleytti upp í því og kjamasaði svo á veislunni. Dálítið eins og að fylgjast með hakkavél Manchester City tæta í sig vonir Púllara á sama tíma. Samhryggist og samgleðst öllum hlutaðeigandi.“
Það er víst ekki á hverjum degi sem maður fær tækifæri til að fylgjasti með hrafni éta máv á vatnsbrunni í Laugardal.
„Að öllu skensi slepptu þá var þetta algjörlega sturlað sjónarspil.“