Hildur Lilliendahl gagnrýnir harðlega orð sem Helgi Bernódusson, fráfarandi skrifstofustjóri Alþingis, lét falla um málþóf. Hún er hvergi nærri ein um að vera misboðið en þekktar konur, svo sem Sóley Tómasdóttir og Tara Margrét Vilhjálmsdóttir, taka undir með henni.
„Eins og fram hefur komið tókst forseta Alþingis að halda hátíð í Kaupmannahöfn í gær (sko 2019) til að fagna sumrinu þar sem einungis karlar komu fram. Aðspurður sagði Steingrímur að þetta væri nú auðvitað bara helber tilviljun, hefði svo auðveldlega getað verið öfugt og bara allir frasarnir,“ skrifar Hildur á Facebook.
Hún segir að steininn hafi þó tekið úr þegar Helgi lét mjög umdeild orð falla. „Nema hvað. Helgi Bernódusson var einn af körlunum sem þarna komu fram. Og honum þótti við hæfi, í miðju þessu pulsupartíi, að láta þessi orð falla í ræðu sinni: „Málþóf á ekkert skylt við málfrelsi, ekki frekar en nauðgun við kynfrelsi.“ Mig langar ekki að samfélaginu mínu sé stýrt af körlum sem hafa nægilega takmarkaðan skilning á reynsluheimi kvenna til þess að þeir finni sig í því að líkja nauðgunum við málþóf. Þetta er niðurlægjandi og ógeðslegt,“ segir Hildur.
Þar vísar hún í ræðu Helga á Hátíð Jóns Sigurðssonar, sem haldin var í Jónshúsi í Kaupmannahöfn í gær. Hann lagðist þar gegn málþófi og líkti við nauðgun. Sóley Tómasdóttir, fyrrverandi borgarfulltrúi, skrifar athugasemd og tekur undir með Hildi. „1960 var að hringja og vill fá þessa karla til baka. Þar geta þeir skipulagt allar kallahátíðirnar sínar, kveðist á og gantast soldið um nauðganir,“ segir Sóley. Tara Margrét gerir það sömuleiðis og segir: „Þetta er ógeðslegt“
„Málþóf á ekkert skylt við málfrelsi, ekki frekar en nauðgun við kynfrelsi.“
-Helgi Bernódusson pic.twitter.com/KDzxWm6gPi— Hildur ♀ (@hillldur) April 26, 2019