Heiðar Guðjónsson hefur verið ráðinn forstjóri Sýnar en þetta kemur fram í tilkynningu sem barst kauphöllinni í gærkvöldi. Samhliða þessu hefur Heiðar, sem var stjórnarformaður, sagt sig úr stjórn félagsins og tekur Hjörleifur Pálsson við stjórnarformennsku.

Þá hefur Sigríður Vala Halldórsdóttir varastjórnarmaður tekið sæti í stjórn.

Í tilkynningunni segir Heiðar að hann sé þakklátur fyrir það traust sem honum er sýnt með ráðningunni. „Framundan eru krefjandi verkefni, sem ég hlakka til að leysa af hendi í samstarfi við allt það framúrskarandi fólk sem starfar hjá Sýn hf.“

Hjörleifur segir að Heiðar hafi stýrt stjórnarstörfum undanfarin ár af röggsemi. „Það er mikill fengur af því að fá hann til þess að leiða daglegan rekstur félagsins, enda hefur hann yfirgripsmikla þekkingu á starfseminni. Við bjóðum hann því velkominn til starfa á nýjum vettvangi.“