„Við höfum náð samkomulagi við Bernhard um að við tökum yfir Honda-umboðið. Í gangi er áreiðanleikakönnun sem við teljum að ljúki á næstu dögum,“ segir Jón Trausti Ólafsson, framkvæmdastjóri bílaumboðsins Öskju. Talið er að Askja eignist Honda-umboðið á næstu mánuðum.
Jón Trausti segir of snemmt að segja til um starfsmannamál hjá Hondu eftir þessa breytingu, en: „Askja gerir ráð fyrir því að taka við stórum hluta þeirra starfsmanna sem sjá um sölu og þjónustu.“ Segir Jón Trausti að meirihluti starfsmanna Hondu haldi störfum sínum, sem hlýtur að fela í sér að einhverjum verður sagt upp. Þetta liggur þó ekki fyrir að svo stöddu og ekki er endanlega staðfest að kaupin gangi í gegn.
Uppfært kl. 14:55
Nokkru eftir birtingu fréttarinnar barst eftirfarandi fréttatilkynning varðandi viðskiptin:
Kaup Öskju á Honda umboðinu á Íslandi
Bílaumboðið Askja ehf. og Bernhard ehf. hafa undirritað kaupsamning um kaup Öskju á þeim hluta reksturs Bernhard ehf. sem fer með Honda umboðið á Íslandi. Í kaupsamningnum er fyrirvari um samkomulag við Honda Motor Company Ltd. vegna kaupanna og samþykki Samkeppniseftirlitsins.
Í viðskiptunum er lagt til grundvallar að áfram verði byggt á þeim góða grunni og öflugu þjónustu sem viðskiptavinir Bernhard ehf. þekkja og eigendur Honda bifreiða á Íslandi hafa notið. Askja áformar að reka Honda umboðið til viðbótar við aðra starfsemi sína, en fyrir er Askja umboðsaðili fyrir Mercedes-Benz og Kia á Íslandi.
Ráðgjafar í viðskiptunum voru Fyrirtækjaráðgjöf Landsbankans fyrir seljanda og KPMG og Advel lögmenn fyrir kaupanda.
Um Bernhard Bernhard hefur verið umboðsaðili Honda á Íslandi allt frá árinu 1962. Bernhard er þekkt fyrir góða þjónustu og hefur alla tíð verið í eigu fjölskyldu stofnandans, Gunnars Bernhard.
Um Öskju Bílaumboðið Askja er þjónustufyrirtæki sem sérhæfir sig í sölu og þjónustu á bifreiðum frá Mercedes-Benz og Kia. Markmið fyrirtækisins er að vera í fararbroddi hvað varðar þjónustu til viðskiptavina og markaðssetningu þeirrar vöru sem fyrirtækið selur og þjónustar.