Þeir sem á annað borð horfa á sjónvarpsfréttir um páskana ættu að kannast við erlenda frétt sem lengi vel var ávallt sýnd á föstudaginn langa, krossfestingar á Filippseyjum.
Svo vitnað sé í eina slíka frá árinu 2011: „Á þriðja tug manna lét krossfesta sig í borginni San Fernando á Filippseyjum í morgun. Þúsundir manna koma til borgarinnar á þessum degi á hverju ári til að fylgjast með þegar heittrúaðir kaþólikkar berja sig með svipum og láta svo síðan negla sig á kross.“
Stefán Pálsson sagnfræðingur vekur athygli á því að nú sé stutt í árlegu fréttina. „Þrír dagar í að við fáum fréttamyndirnar af óðu Filippseyingunum sem láta krossfesta sig. Spurning um að vinna aðeins meira með þetta í ár? Kynnast þátttakendum fyrirfram – jafnvel búa til úr þessu skemmtilega keppni?,“ skrifar Stefán á Facebook.
Jóhann Hlíðar Harðarson, fréttamaður á RÚV, segir í athugasemd að RÚV hafi ákveðið að hætta að fjalla um þetta. „Vek athygli þína á því að það eru þó nokkur ár síðan RÚV gerði síðast frétt um þetta. Það var ákaflega meðvituð ákvörðun,“ skrifar Jóhann Hlíðar.