Á áttunda tímanum í gærkvöldi var tilkynnt um slagsmál unglinga í Hafnarfirði og voru slagsmálin sögð harkaleg. Einn var talinn nefbrotinn eftir þau og var hann fluttur á slysadeild. Málið er nú til rannsóknar.
Á níunda tímanum í gærkvöldi var beðið um aðstoð vegna þjófnaðar úr verslun í Breiðholti. Meintur þjófur var í tökum starfsmanna en veitti mikla mótspyrnu. Þegar lögreglan kom á vettvang hafði hann náð að losa sig og veittist að starfsmanni. Lögreglumenn yfirbuguðu manninn og handtóku og var hann vistaður í fangageymslu.
Síðdegis í gær var brotist inn í bifreið í miðborginni og myndavél og reiðufé stolið úr henni. Á tíunda tímanum í gærkvöldi var karlmaður handtekinn grunaður um innbrotið og fleiri brot. Hann var vistaður í fangageymslu.
Á öðrum tímanum í gær slasaðist maður um tvítugt á trampólíni í Kópavogi. Hann meiddist á ökkla og var fluttur með sjúkrabifreið á slysadeild.
Á öðrum tímanum í gær voru tveir útlendingar staðnir að ólöglegri veiði í Leirvogsá. Þeir höfðu ekki veitt neitt þegar lögreglan kom á vettvang.