Ef allt fer á versta veg hjá WOW gæti það tekið nokkra daga að leysa úr þeirri flækju sem upp kæmi varðandi farþega hér á landi og erlendis. Nokkra daga gæti tekið að koma fólki til síns heima.

Frá þessu greinir Morgunblaðið í dag en blaðið hefur undir höndum sviðsmyndagreiningu þar sem meðal annars er lagt mat á afleiðingar allsherjarstöðvunar. Um er að ræða áætlun sem miðast við 11 véla flota WOW og eru þrjár sviðsmyndir á borðinu, allt eftir því hvar vélar WOW eru staðsettar ef til allsherjar rekstrarstöðvunar kemur.

Þannig myndu um 1.500 farþegar verða strandaglópar á Íslandi ef til allsherjarstöðvunar kæmi fyrir klukkan sex á morgnana en um 700 farþegar upp úr hádegi. Þá eru vélar WOW í Keflavík. Auk þess væru um 150 til 180 Íslendingar í Norður-Ameríku sem ekki kæmust heim.

Ef reksturinn myndi stöðvast eftir að vélar félagsins halda af stað til Evrópu eða væru ekki lagðar af stað til Íslands væru um 400 Íslendingar strandaglópar erlendis en um 700 erlendir ferðamenn á Íslandi sem ekki kæmust í flug til Norður-Ameríku.

Um tvö hundruð Íslendingar væru svo strandaglópar ef rekstur stöðvast eftir að vélar félagsins halda til Norður-Ameríku eða eru ekki farnar frá áfangastöðum í álfunni.

Í frétt Morgunblaðsins er rætt við sérfræðing sem komið hefur að sviðsmyndagreiningunni. Hann segir að það tæki alltaf nokkra daga að koma þeim erlendu ferðamönnum sem hér dvelja til síns heima ef allt færi á versta veg. Það ætti að leysast á tveimur dögum en verkefnið tæki í það heila fimm til sex daga að teknu tilliti til þeirra Íslendinga sem væru fastir erlendis. Það færi þó allt eftir bókunarstöðu þeirra flugfélaga sem fljúga til Íslands.