„Ég sé hér á Facebook að fólk er að deila skilaboðum að það sé alltaf einhver vinur eða fjölskyldumeðlimur tilbúinn til að hlusta, og bæta við hasstagginu #sjálfsvígsforvarnir. Ég veit að þetta er gert af góðum hug en að mínu mati er engin sérstök sjálfsvígsforvörn í því að haga sér bara eins og almennileg manneskja og vera til staðar fyrir þitt fólk.“

Þetta segir blaðakonan Erla Hlynsdóttir á Facebook en hún þekkir málefnið af eigin raun þar sem faðir hennar, Hlynur Þór Magnússon, svipti sig lífi um jólin 2017. Ekki er vitað hvort hann hafi látist á aðfangadag eða jóladag. Erla var einkadóttir hans.

Erla segir að ekki sé hægt að lækna þunglyndi einungis með því að hlusta á viðkomandi. „Þegar þínir nánustu eru í sjálfsvígshugleiðingum þurfa þeir hins vegar á læknisaðstoð að halda og enginn skal halda að honum hafi mistekist að koma í veg fyrir sjálfsvíg því hann var ekki nógu duglegur að hlusta,“ segir Erla.

Hún bætir við að þrýstingurinn eigi fyrst og fremst að vera á ríkið en ekki ættingja eða vini. „Geðsjúkdómar eru grafalvarlegur vandi sem fjársvelt heilbrigðiskerfi er ekki að sinna sem skyldi. Setjum pressuna á stjórnvöld, ekki á vini og ættingja. Við ætlumst ekki til þess að vinir okkar hlúi að beinbrotum og nýrnabilunum. Þunglyndi er raunverulegur sjúkdómur – og lífshættulegur – og á að vera meðhöndlaður sem slíkur. Til þess þurfum við hins vegar alvöru heilbrigðiskerfi og það er einfaldlega ekki til staðar.“