Um miðnætti var björgunarskip Slysavarnarfélagsins Landsbjargar í Neskaupstað kallað út vegna vélarvana báts. Fljótlega kom í ljós að báturinn var ekki vélarvana en á hinn bóginn var hann að hluta rafmagnslaus og án siglingatækja af þeim sökum. Bátnum var fylgt til hafnar í Neskaupstað og var hann kominn þangað á þriðja tímanum í nótt.

Björgunarsveitir á Suðurlandi voru kallaðar út í nótt til leitar að fólki á Langjökli. Fólkið var á þremur jeppum og óttuðust aðstandendur þess um það. Sjö jeppar voru sendir til leitar og tókst fljótlega að staðsetja fólkið en það er ekki langt frá Þórisjökli sunnan Langjökuls. Um hálf átta sá björgunarsveitarfólk til jeppanna segir í tilkynningu frá Landsbjörg. Þeir eru töluvert sunnan Langjökuls, rétt norðan við Skjaldbreið. Björgunarsveitarfólk er rétt ókomið til bílanna en ekki er talið að neitt ami að fólkinu.