Davíð Rúnar Bjarnason er um þessar mundir að undirbúa sig fyrir ofurmaraþonið Spartan Ultra Beast sem haldið verður í Frönsku Ölpunum í júlí. Davíð er yfirþjálfari hnefaleika í Hnefaleikafélagi Reykjavíkur/Mjölni, ásamt því að sjá um einka- og hóptíma í World Class. Hann segir í samtali við DV að hann æfi sig mikið á hverjum einasta degi og oftast meira en einu sinni á dag. Í maraþoninu mun hann taka þátt í yfir 60 þrautum sem innihalda meðal annars það að skríða undir gaddavír upp brekku, Burpees-æfingar og að bera 30 kílóa tunnu fulla af steypu. Davíð hefur nú þegar fengið styrktaraðila sem bera kostnaðinn af þátttöku hans í maraþoninu en einnig tók hann þá ákvörðun að vilja láta gott af sér leiða.
„Ég ætla að þekja bakið á æfingabolnum mínum fram að keppni með merkjum frá þeim fyrirtækjum sem vilja taka þátt með peningagreiðslu. Peningurinn rennur allur óskiptur til Fanneyjar Eiríksdóttur og hennar fjölskyldu en hún berst við krabbamein. Hún á eiginmann og tvö ung börn og þrautseigjan í henni er engu lík verandi í þessum sporum.“
Segist Davíð koma fyrir um það bil 20 merkjum frá fyrirtækjum á bakið en þó vilji hann reyna að safna sem mestu fyrir fjölskylduna. Hann hefur því stofnað styrktarreikning á sínu nafni sem mun renna óskiptur til Fanneyjar: Rkn.0140-26-552500 og kt.050589-2269. Þá biður hann fyrirtæki sem taka vilja þátt í verkefninu með sér að hafa samband við sig á netfanginu: davidboxari@gmail.com.