Loftslagsbreytingar hafa ýmsar afleiðingar í för með sér en á Mount Everest, hæsta fjalli jarðar, eru sífellt fleiri lík að koma fram í dagsljósið. Talið er að um 300 einstaklingar hafi látist við að reyna að klífa fjallið, en af þeim er talið að um 200 séu enn á fjallinu.
„Vegna loftslagsbreytinga og bráðnunar íshellunnar og jökulsins eru lík þeirra sem hafa látist á fjallinu að verða sýnileg,“ segir Ang Tshering Sherpa, fyrrverandi forseti Félags fjallaleiðsögumanna í Nepal, í samtali við BBC.
Að undanförnu hefur staðið yfir vinna við að fjarlægja lík á því svæði fjallsins sem tilheyrir Kína. Sumir þessara einstaklinga létust fyrir áratugum síðan.
Í frétt BBC er vísað í rannsóknir sem hafa sýnt að talsverð bráðnun íss hefur átt sér stað á Everest-svæðinu á undanförnum árum og áratugum.
Frétt BBC