Anton Örn Guðnason hefur verið dæmdur í þriggja mánaða fangelsi en hann var í tvígang gómaður með fíkniefni á Litla-Hrauni í fyrra. Þar situr hann af sér fimm og hálfs árs fangelsisdóm fyrir manndrápstilraun.
Samkvæmt dómi var hann annars vegar tekinn síðasta sumar með 146 einingar af LSD og tæplega þrjú grömm af kókaíni í fangaklefa sínum á Litla-Hrauni. Hann var svo gómaður síðastliðinn desember með 0,3 grömm af MDMB-CHMICA, sem er nokkurs konar gervigras (e. synthetic cannabinoid).
Anton Örn var í fyrra dæmdur í fimm og hálfs árs fangelsi fyrir manndrápstilraun. Hann réðst inn á heimili fórnarlambsins í slagtogi við tvo aðra menn og voru þeir vopnaðir hnífum og mace-brúsum. Hann stakk manninn svo í kviðinn. Mennirnir sögðust hafa verið staddir á heimili fórnarlambsins í þeim erindagjörðum að rukka inn 2 milljón króna skuld, en þeir sökuðu hann um að hafa stolið fíkniefnum af Antoni Erni.