Tveir voru fluttir með sjúkrabíl á Heilbrigðisstofnun Suðurnesja eftir að bílvelta varð á Suðurstrandarvegi í fyrrakvöld.
Í skeyti frá lögreglu kemur fram að meiðsl þeirra hafi sem betur fer ekki reynst vera alvarlegs eðlis. Mikil hálka var á vettvangi þegar óhappið varð, að sögn lögreglu.
Áður hafði orðið umferðaróhapp á Norðurljósavegi þegar ökumaður missti bifreið sína út af og hafnaði hún í hrauninu við veginn. Ökumaður slapp ómeiddur en bifreiðin var talsvert tjónuð.