Á fyrsta tímanum í nótt var ekið á lögreglubifreið í Hafnarfirði. Tjónvaldurinn er grunaður um ölvun við akstur og er sviptur ökuréttindum. Hann var vistaður í fangageymslu vegna rannsóknar málsins.

Á öðrum tímanum í nótt tóku lögreglumenn í Hafnarfirði eftir ökumanni sem notaði blá neyðarljós (forgangsljós) í akstri og var eins og hann væri að reyna að stöðva aksturs annars ökumanns. Þegar lögreglan ætlaði að hafa afskipti af ökumanninum jók hann hraðann og reyndi að stinga lögregluna af. Það tókst ekki. Hald var lagt á neyðarljósabúnaðinn og maðurinn kærður.

Á sjötta tímanum í gær lagðist kona fyrir framan bifreið á Miklubraut. Vegfarandi færði konuna af akbrautinni áður en lögreglan kom á vettvang. Hún var í annarlegu ástandi og framvísaði fíkniefnum. Henni var ekið á heilbrigðisstofnun þar sem hún ætlaði að leita aðstoðar.

Á tíunda tímanum í gærkvöldi voru tveir menn í annarlegu ástandi handteknir í hverfi 104 en þeir eru grunaðir um innbrot/þjófnað og nytjastuld bifreiðar. Þeir voru vistaðir í fangageymslu.

Fjórir ökumenn voru handteknir í gærkvöldi og nótt grunaðir um akstur undir áhrifum fíkniefna og ýmis önnur brot.

Tveir voru handteknir grunaðir um ölvun við akstur. Annar þeirra bakkaði á kyrrstæða bifreið beint fyrir framan lögreglumenn.