Fjölskylda Jóns Þrastar Jónssonar, sem hvarf á Írlandi 9. febrúar biðlar nú til almennings í Írlandi að aðstoða þau við leitina. Eftir ítarlega og nákvæma leit á því svæði hefur ekkert fundist og ólíklegt þykir að Jón Þröst sé þar að finna.
Fjölskylda hans hefur nú komið af stað herferðinni: „Hefur þú séð bróður minn“ þar sem þau óska eftir því að almenningur dreifi myndum af Jóni, í von um nýjar upplýsingar.
„Við hvetjum fólk til að prenta út myndir af Jóni og koma þeim fyrir á eins mörgum stöðum og mögulegt er, þar með talið á vinnustöðum, bílrúðum, lestar- og strætóstöðvum sem og íþróttaviðburðum,“ segir bróðir Jóns, Davíð Karl Wiium.
Myndina má finna hér
„Við vonum að með þessu móti muni myndin berast til réttu manneskjunnar,“ sagði Davíð.
Jón yfirgaf hótelið Bonnington í Dublin klukkan 11:05 laugardaginn 9. febrúar. Hann sást síðast á öryggismyndavél fyrir utan Highfield spítalann og stefndi fótgangandi norður á götunni Swords Road í átt að Collins Avenue. Hann sést ekki á neinum myndavélum eftir það. Það þykir mögulegt að hann hafi farið inn í eitthvert farartæki og ferðast eitthvert innan Írlands. Þar sem hann skildi vegabréf sitt eftir á hótelinu þykir ólíklegt að hann hafi yfirgefið landið, en það er þó mögulegt að hann hafi náð að komast til Norður Írlands eða Englands án vegabréfs.
Fjölskylda hans hefur leitað hans síðan hann hvarf fyrir mánuði síðan og ætlar ekki að yfirgefa landið án hans. „Við munum ekki gefast upp. Við erum svo innilega þakklát fyrir þann stuðning og aðstoð sem við höfum fengið frá Írum og við vonumst til þess að þessi herferð okkar muni hjálpa okkur að fá Jón heim,“ sagði Davíð.
Jón er lýst sem hlýjum og umhyggjusömum föður fjögurra barna og sé það afar ólíkt honum að láta sig hverfa. Hann er 184 cm á hæð, dökkhærður með gráblá augu. Það þykir ólíklegt að hann sé með skegg. Hann sást síðast í svörtum gallabuxum, svörtum jakka, svörtum stuttermabol með hvítri áletrun og svörtum strigaskóm með hvítum sóla.