Íslendingurinn Svavar Ragnarsson rekur veitingastað í Nýja Sjálandi í borginni Christchurch þar sem hryllileg hryðjuverkaárás átti sér stað fyrr í dag. Hann sagði í samtali við fréttastofu RÚV að borgin sé vanalega friðsæl og að íbúar séu í áfalli.
„Við heyrðum fyrst af þessu líklega um hálf þrjú að staðartíma að það hefði verið einhver skotárás og ég fór að keyra heim til að sækja dætur mínar í skólann úthverfi Christchurch og svo bara fór að koma í ljós að þetta var svona rosalega alvarlegt.“
Árás var gerð á tvær moskur í borginni og að minnsta kosti 49 létu lífið í árásunum.
„Þegar ég var að reyna að komast heim þá var önnur hver gata lokuð. Í sömu götu og veitingastaðurinn okkar er þar voru höfuðstöðvar lögreglunnar og þegar ég er að keyra framhjá þar til dæmis þá komu út tvær lögreglukonur með stærstu skotvopn sem ég hef séð og fóru upp í bíl og ég náði ekki að keyra nema svona í fimm mínútur án þess að sjá tvo eða þrjá lögreglubíla með full ljós á eða sjúkrabíla.“
Árásin átti sér stað síðdegis að staðartíma og voru margir við bænahald í moskunum. Sjónarvottur segir að árásarmaðurinn hafi gengið skipulega til verks og að skothríðin hafi varað í um 20 mínútur. Skólum og leikskólum var lokað um hríð, foreldrum meinað að sækja börn, líklega í aðgerðum til að tryggja öryggi.
„En það sem var svo sérstakt það voru allir að fara í sitt hvora áttina. Það var eitthvað um að vera sem sagt alls staðar í borginni. Svo tæmdust bara göturnar svona upp úr að verða fjögur. Það sem var kannski mesta sjokkið fyrir okkur var að skólarnir, meira að segja í úthverfunum þeir voru settir í „lock-down“.“
Árásir sem þessar eru afar fátíðar á Nýja Sjálandi, síðast átti slík sér stað árið 1990 þar sem 13 voru skotnir til bana í litlu þorpi.
„Fólk bara trúir þessu ekki. Það er bara, Christchurch er ekki svona. Þetta er svo friðsæll og rólyndur bær. Ég meina það er svo sjaldgæft að það séu glæpir hérna, eða eitt eða neitt,. Ég held að sjokkið fyrir fólkið hérna sé álíka og það hefði verið fyrir fólkið í Reykjavík.“
Sjá einnig:
49 eru látnir eftir hryðjuverkin á Nýja Sjálandi
Andlit illskunnar – Segist hafa notið aðstoðar Anders Breivik við hryðjuverkin á Nýja Sjálandi
Hryðjuverk í tveimur moskum á Nýja-Sjálandi
