Sunna Dögg nokkur hefur vakið talsverða athygli á Twitter fyrir stöðufærslu þar sem hún biðlar til almennings að gæta orða sinna í garð Sigríðar Andersen, fráfarandi dómsmálaráðherra. Fjölmargir hafa ekki sparað stóru orðin á samfélagsmiðlum og hraunað yfir Sigríði.

Líkt og DV greindi frá í gær þá hefur vika Sigríðar verið erfið. Á mánudaginn lést móðir Sigríðar, Brynhildur Kristinsdóttir Andersen, á Landspítalanum, 80 ára að aldri.

Sjá einnig: Margir minnast Brynhildar og senda Sigríði samúðarkveðjur: „Móðir þín var einstök kona“

Tíst Sunnu hefur hlotið fjölda læka en þar segir hún: „Að gefnu tilefni: Mig langar að minna á að Sigríður Andersen á tvær ungar dætur sem vita alveg hvernig internetið virkar. Þær misstu ömmu sína(móður Sigríðar) á mánudaginn og þurfa að sitja undir shitstormi á móður sína núna.“

Hún bætir svo við að það sé ekkert að málefnalegri gagnrýni. „Ekkert að því að gagnrýna stjórnarhætti Sigríðar í pólitík, en slaka aðeins á persónulegum svívirðingum. Ég er ekki aðdáandi Sjálfstæðisflokksins, en ég þekki Siggu og hennar fjölskyldu og þau eru indælis fólk sem eiga þetta ekki skilið á svona stundu,“ segir Sunna.

Að gefnu tilefni: Mig langar að minna á að Sigríður Andersen á tvær ungar dætur sem vita alveg hvernig internetið virkar. Þær misstu ömmu sína(móður Sigríðar) á mánudaginn og þurfa að sitja undir shitstormi á móður sína núna.

— Sunna Dögg (@sunnasigrunar) March 13, 2019

Hún er ekki ein um að benda á þetta á Twitter, en Sigríður Erla Sturludóttir, dóttir Sturlu Böðvarssonar, fyrrverandi þingmann Sjálfstæðisflokksins, hefur svipaða sögu að segja. „Stundum staldra ég við og þakka fyrir að hafa verið dóttir þingmanns, ráðherra og forseta Alþingis fyrir tíma kommentakerfa og Twitter,“ skrifar Sigríður Erla.

Stundum staldra ég við og þakka fyrir að hafa verið dóttir þingmanns, ráðherra og forseta Alþingis fyrir tíma kommentakerfa og Twitter.

— Sigríður Erla Sturlu (@SiggaErla) March 13, 2019