Á þriðja tímanum í nótt var tilkynnt um grunsamlegan mann á ferð í Garðabæ. Hann hafði hringt dyrabjöllu á húsi einu en orðið vandræðalegur mjög þegar húsráðandi kom til dyra. Taldi húsráðandi að maðurinn hafi talið að enginn væri heima. Hann sagðist vera í söluerindum og hefði farið húsavillt.

Lögreglumenn fundu manninn skömmu síðar þar sem hann sat í bifreið. Hann var handtekinn en hann er grunaður um nytjastuld bifreiðar, brot á vopnalögum og vörslu fíkniefna. Hann var vistaður í fangageymslu.

Á níunda tímanum í gærkvöldi var tilkynnt um ónæði frá íbúð í fjölbýlishúsi í Kópavogi. Þrennt var í íbúðinni og eru þau grunuð um vörslu fíkniefna. Par var handtekið og vistað í fangageymslu en það var í mjög annarlegu ástandi. Skýrsla var tekin á vettvangi af þriðja aðilanum.

Á sjötta tímanum í gær var karlmaður handtekinn en hann hafði stolið vörum úr verslunum í hverfum 105 og 108. Hann var vistaður í fangageymslu.

Um klukkan 23 í gærkvöldi var tilkynnt um eld í bát í Vogahverfi. Enginn eldur var sjáanlegur en mikill reykur var. Talið er að hann hafi komið frá rafgeymum. Óljóst er hversu mikið tjón varð.

Þrír ökumenn voru handteknir grunaðir um akstur undir áhrifum fíkniefna og einn var handtekinn grunaður um ölvun við akstur.