Málflutningur fyrir Landsrétti í áfrýjuðu máli gegn Magnúsi Ólafi Garðarssyni, fyrrverandi forstjóra United Silicon, hófst í gær. Þetta kemur fram í Morgunblaðinu í dag. Magnús var í fyrra dæmdur í fjöggura mánaða skilorðsbundið fangelsi í Héraðsdómi, var sviptur ökuréttindum í 12 mánuði og dæmdur til að greiða ökumanni sem slasaðist í árekstrinum 600 þúsund krónur í miskabætur. Saksóknari krefst þess að dómurinn verði þyngdur, ökuleyfissvipting hans verði aukin og Tesla-bíll Magnúsar verði gerður upptækur varanlega.
Sannað þótti að Magnús hefði verið á 180 km hraða þegar áreksturinn varð á Reykjanesbrautinni. Tesla-bíll Magnúsar er afar kraftmikill, eða 690 hestafla. Magnús var handtekinn á vettvangi en hann neitaði því að hafa verið handtekinn í samtali við DV og sagðist aðeins hafa fengið far hjá lögreglumanni í vinnuna. Fyrir dómi neitaði hann því að hafa verið á 180 km hraða en hann hafi hnerrað rétt fyrir áreksturinn sem olli því að hann spólaði. Rannsóknir á Tesla-bílnum leiddu í ljós að hann var á þessum mikla hraða rétt áður en áreksturinn varð. Magnús ók aftan á Toyota Yaris bíl á Reykjanessbrautinni með þeim afleiðingum að ökumaður þess bíls slasaðist.
Árið 2017 var Magnús kærður fyrir auðgunarbrot og skjalafals í starfi sínu sem forstjóri United Silicom. Þau mál hafa ekki verið til lykta leidd.
Sjá einnig: Grunaður um stórfelld auðgunarbrot og skjalafals
