Fjölmiðlamaðurinn Helgi Seljan gagnrýnir harðlega réttarkerfið á Íslandi og kallar einangrunarvist séríslenskt fúsk og pyntingu. Hann vísar í fréttir um að 70 prósent fanga í gæsluvarðhaldi séu settir í einangrun.
„Sú staðreynd að Íslendingar beiti einangrunarvist langt umfram það sem gerist og gengur í siðuðum ríkjum hefur legið fyrir lengi. Og það sem meira er, þá var Íslenska Ríkið dæmt fyrir að brjóta gegn ákvæðum stjórnarskrár sem leggja bann við pyntingum, fyrir tveimur árum í einkar ógeðfelldu máli manns sem sætti einangrun á lögreglustöð við ömurlegar aðstæður,“ segir Helgi.
Hann segir Hæstarétt þrátt fyrir þetta nánast undantekningalaust samþykkja slíkar beiðnir. „Samt hefur sami Hæstiréttur haldið áfram að stimpla nær athugasemdalaust, og raunar af meiri krafti en árin þar á undan upp á óskir lögreglu um einangrunarvist gæsluvarðhaldsfanga, langt umfram það sem virðist duga til að reka sæmilegt réttarkerfi í nágrannalöndum okkar,“ segir Helgi.
Hann segir að það sé skýr ástæða fyrir þessu. „Það er verst geymda leyndarmál þessa kerfis að einangrunarvist sé notuð til að þvinga menn til samstarfs eða járninga. Að reyna að halda öðru fram er beinlínis móðgun við almenna skynsemi,“ segir Helgi.
Hann hjólar svo að lokum í dómara og spyr hvort að þeir séu andlega fjarverandi meðan þeir sveipa sig skikkjum. „En Dómarafélagið hélt málþing. Og lét taka saman tölur um dagleg störf sinna eigin félagsmanna. Og sér að ástandið versnar. Kom það þessum gæjum á óvart? Eru þeir andlega fjarverandi á meðan þeir sveipa sig þessum tilgerðarlegu ullarsatín-skikkjum sínum. Eftir tvö ár verður haldið nýtt málþing. Og einhver lagaprófessor setur í brýrnar. Og aftur verða þeir hissa,” segir Helgi.