fbpx
Miðvikudagur 20.mars 2019

DV - Frjáls og óháður miðill

Fréttir

Lögreglan svarar fyrir átökin í gær og segist forðast valdbeitingu eins og hægt er

Ágúst Borgþór Sverrisson
Þriðjudaginn 12. mars 2019 13:59

Ekki missa af Helstu tíðindum dagsins í pósthólfið þitt

Lesa nánar

Borist hefur tilkynning frá lögreglunni þar sem svarað er fyrir átök sem urðu á milli lögreglu og mótmælenda á Austurvelli í gær. Lögreglan beitti piparúða og tveir mótmælendur voru handteknir. Lögreglu virtist sem verið væri að hlaða bálköst á Austurvelli og lagði því hald á pappaspjöld í fórum mótmælenda. Við það kom til stympinga. Einnig segir í tilkynningunni að um tíu manns hafi fengið á sig piparúða en alls voru mótmælendur um 70 talsins þegar mest var. Ástæðan fyrir því að piparúða var beitt var sú að hluti mótmælendanna gerði aðsúg að lögreglu. Í tilkynningunni er lögð áhersla á það að lögreglan sé ekki andstæðingur mótmælenda:

Tilkynningin er eftirfarandi:

Mótmæli til að vekja athygli á réttarstöðu hælisleitenda hófust á Austurvelli um kl. 15 í gær og stóðu fram undir kvöld. Hælisleitendur og stuðningsfólk þeirra skipulögðu mótmælin. Lögreglan hafði venjubundinn viðbúnað við Alþingishúsið af þessum sökum.

Ekki var sótt um leyfi fyrir mótmælunum á Austurvelli, eins og venjan er, né um leyfi til að fá að tjalda þar. Mótmælendur settu engu að síður upp tjöld og mynduðu skjaldborg í kringum þau. Lögreglan gerði mótmælendunum grein fyrir því að þeir gætu ekki tjaldað á Austurvelli án leyfis. Lögreglumenn tóku því tjöldin og kom þá til stimpinga. Eftir það róaðist yfir mótmælunum.

Á sjöunda tímanum lagði lögreglan hald á pappaspjöld og vörubretti úr fórum mótmælenda því hún taldi að verið væri að hlaða í bálköst. Mótmælendurnir reyndu að verja spjöldin og brettin með því að leggjast ofan á þau. Þurfti lögreglan þá að beita afli. Einn mótmælandinn sparkaði í lögregluþjón og var hann í kjölfarið handtekinn. Annar mótmælandi réðist þá að lögregluþjóninum sem sá um handtökuna og var sá einnig handtekinn. Lögreglan flutti einstaklingana tvo inn í lögreglubíla í Templarasundi, við Dómkirkjuna.

Hluti mótmælenda gerði við það aðsúg að lögreglunni og var piparúða þá beitt. Beiting piparúðans var metið vægasta stig valdbeitingar við þessar aðstæður þar sem  litið var svo á að verið væri að ráðast á lögregluna við skyldustörf. Lögreglan óskaði umsvifalaust eftir sjúkrabíl til að vera til taks til að hjálpa fólkinu sem fyrir varð að hreinsa burt efnið og skola augu sín. Ekki er vitað um nein alvarleg meiðsl hjá mótmælendum eða lögreglumönnum vegna þessa.

Þeim tveim einstaklingum sem voru handteknir, Íslendingi og hælisleitanda, var sleppt í gærkvöldi að lokinni skýrslutöku. Áætlað er að mótmælendur hafi verið 70-80 talsins og lögreglumenn um 20 þegar mest var. Lögreglan áætlar að um 10 manns hafi fengið piparúða yfir sig.

Lögreglan hlustar á alla gagnrýni og það er eðlilegt að framganga hennar sé ávallt til skoðunar, hvort sem er af almenningi, fjölmiðlum og kjörnum fulltrúum. Það er skiljanlegt að það veki eftirtekt þegar lögregla neyðist til að verja sig með varnarúða. Það er ekki með ánægju sem slíkum meðölum er beitt. Lögreglan forðast þvert á móti í lengstu lög að fara valdbeitingarleiðina. Þegar hins vegar mótmæli færast yfir í skemmdarverk eða ef mótmælendur óhlýðnast beinum fyrirmælum lögreglumanna eða ráðast gegn þeim við skyldustörf þá er bæði öryggi bæði borgaranna og okkar sem störfum sem lögreglumenn, stefnt í hættu. Við því verður lögreglan ávallt að bregðast.

Flest mótmæli undanfarinna ára hafa farið vel fram og í góðri samvinnu lögreglu, borgaranna og annarra yfirvalda. Lögreglan virðir að sjálfsögðu stjórnarskrárbundinn rétt almennings til mótmæla og tjáningarfrelsis. Langflestir mótmælenda virða sömuleiðis hlutverk og ábyrgð lögreglu og sýna því skilning að við þurfum ávallt að huga að öryggi borgaranna.

Lögreglan er alltaf til viðræðu við mótmælendur og við vonumst til að ekki þurfi að koma til sambærilegra aðgerða lögreglu á mótmælum sem fyrirhuguð eru í dag. Lögreglan er ekki andstæðingur mótmælenda. Hælisleitendur eru hópur í veikri stöðu, eins og lögreglan þekkir sjálf vel til, en staða þeirra verður ekki bætt með því að efna til áfloga við lögreglu. Lögreglan biður mótmælendur um að halda sig við friðsamlegar aðgerðir og leggur áherslu á að þeir fylgi fyrirmælum lögreglu á vettvangi.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af

Fréttir
Fyrir 21 klukkutímum

Stöðvaður í Staðardal með gras í bílnum

Stöðvaður í Staðardal með gras í bílnum
Fréttir
Fyrir 22 klukkutímum

Hannes fær á baukinn: „Þarf að hringja í vælubílinn?“

Hannes fær á baukinn: „Þarf að hringja í vælubílinn?“
Fréttir
Í gær

Kona með hjarta úr gulli kom Pétri til bjargar í Kópavogi: „Guð blessi þig yndislega kona“

Kona með hjarta úr gulli kom Pétri til bjargar í Kópavogi: „Guð blessi þig yndislega kona“
Fréttir
Í gær

Sigurþóra komin með húsnæði fyrir Bergið á dánardegi sonar síns – „Táknrænt að nota dagsetningu á versta degi lífs míns“

Sigurþóra komin með húsnæði fyrir Bergið á dánardegi sonar síns – „Táknrænt að nota dagsetningu á versta degi lífs míns“
Fréttir
Fyrir 2 dögum

Þórarinn segir Ellý smána látinn mann: „Útmálaður sem drykkfelldur ofbeldismaður og slepjulegur flagari“

Þórarinn segir Ellý smána látinn mann: „Útmálaður sem drykkfelldur ofbeldismaður og slepjulegur flagari“
Fréttir
Fyrir 2 dögum

Guðmundur: „Manni líður stundum eins og sá síðasti hressi á opinberum vettvangi hafi verið Hemmi Gunn“

Guðmundur: „Manni líður stundum eins og sá síðasti hressi á opinberum vettvangi hafi verið Hemmi Gunn“