Sænski verslunarrisinn IKEA hefur verið gagnrýndur töluvert vegna heimskorts sem er til sölu í verslunum fyrirtækisins. Á heimskortinu sem um ræðir, BJORKSTA, er nefnilega ekki að finna nokkuð stórt ríki sem telur um fimm milljónir íbúa.

Til að gera langa sögu stutta vantar Nýja-Sjáland á kortið eins og sjá má. Nýja-Sjáland er tæplega þrisvar sinnum stærra en Ísland, en eins og kunnugir vita er það staðsett suðaustur af Ástralíu.

Það er ef til vill kaldhæðnislegt að hugsa til þess að fyrsta IKEA-verslunin mun einmitt opna í Auckland á Nýja-Sjálandi innan skammst.

Myndinni var dreift á Reddit en þetta tiltekna kort var til sölu í verslun IKEA í Washington DC í Bandaríkjunum. Þetta fór skiljanlega ekki vel í íbúa Nýja-Sjálands sem gagnrýndu IKEA fyrir að gleyma landinu.

„Vonandi notar IKEA ekki sitt eigið landakort þegar þeir reyna að finna okkur fyrir opnuna í Auckland,“ sagði til að mynda einn.