„Jæja þá eru verið að ræsa alla hræðsluáróðursmeistara forréttindahópanna út og nú eru þeir látnir öskra hátt og skýrt, kröfur verkalýðshreyfingarinnar mun valda óðaverðbólgu í íslensku samfélagi ef krafa um að lágmarkslaun nái 425.000 á þremur árum!“
Þetta segir Vilhjálmur Birgisson, formaður Verkalýðsfélags Akraness og 1. Varaforseti ASÍ, í pistli á Facebook-síðu sinni. Hann segir að áróðursmeistarar reyni nú að kenna verkafólki um óstöðugleika og ef verðbólgan eykst.
„Þessi hræðsluáróður mun glymja á næstu dögum í öllum fjölmiðlum frá lobbíistum forréttindahópanna orð eins og gengið mun falla, óðaverðbólga, atvinnuleysi og önnur óáran mun hellast yfir íslenskt samfélag ef þessar sturluðu kröfur um að hægt verði að lifa af lágmarkslaun nær í gegn. En skoðum nánar þennan hræðsluáróður er hann réttur? Hvar var verðbólgan t.d. fyrir hrun og voru það launahækkanir verkafólks sem voru að keyra verðbólguna upp frá janúar 2004 til ársloka 2007 sem gerðu það að verkum að stýrivextir Seðlabankans hækkuðu frá 5,3% í 13,3%,“ segir Vilhjálmur.
Hann segir að það sé ekki launahækkanir sem auki verðbólgu. „Nei svo sannarlega voru það alls ekki launahækkanir sem keyrðu verðbólguna upp fyrir hrun heldur var það húsnæðisliðurinn í neysluvísitölunni sem bar algerlega ábyrgð á því eða hækkun á fasteignamarkaði.
Skoðum verðbólguna frá árinu 2003 til ársloka 2008 með og án húsnæðisliðar
Takið eftir meðaltals verðbólga áranna 2003 til loka árs 2007 var 4,1% en án húsnæðisliðar var meðaltals verðbólga einungis 2,18% eða með öðrum orðum undir verðbólgu markmiði Seðlabankans. Takið eftir eftir 53% af verðbólgunni á Íslandi fyrir hrun var vegna þess að húsnæðisliðurinn keyrði verðbólguna upp það voru ekki launahækkanir eins og alltaf er haldið fram. Takið líka eftir eins og áður sagði þá fóru stýrivextir Seðlabankans úr 5,3% í 13,3% þrátt fyrir að verðbólga hafi verið einungis 2,18% án húsnæðisliðar,” skrifar Vilhjálmur.
Vilhjálmur segir enn fremur að verðbólga eftir hrun væri sáralítil ef húsnæðisliðurinn væri ekki meðtalinn. „Þetta sögðu þessir snillingar fyrir kjarasamningana sem gerðir voru í febrúar 2008 og við gengum frá hóflegum kjarasamningum 2008, en samt kom hrun með skelfilegum afleiðingum fyrir alþýðu þessa lands og heimilin. Það var ekki kjarasamningum alþýðunnar um að kenna, nei það var vegna þess að verið var að ræna bankanna innan frá eins og allir þekkja!
En hvernig hefur verðbólgan verið eftir hrun?
Takið eftir verðbólga á Íslandi frá desember 2013 til desember 2018 er einungis 0,21% ef húsnæðisliðurinn væri ekki með eins og hjá öðrum þjóðum!
En rifjum upp í ljósi þessara staðreynda að verðbólgan var að meðaltali ár hvert þessi ár, einungis 2,41% og 0,21% án húsnæðisliðar, hvað Samtök atvinnulífsins sögðu þegar verkalýðshreyfingin gerði kröfu um að lágmarkslaun yrðu 300.000 þúsund,“ skrifar Vilhjálmur.
Vilhjálmur segir að allt tal um verðbólgu vegna launahækkana bull og blaður. „Í glórulausum hræðsluáróðri Samtaka atvinnulífsins sagði í einni sviðmyndinni sem þeir drógu upp árið 2015 að ef gengið yrði að kröfum okkar um að lagmarkslaun færu í 300.000 krónur að þá myndi verðbólgan hækka í 20% og verðtryggðarskuldir heimilanna myndu hækka um allt að 475 milljarða. Ég ítreka að þessi skefjalausi hræðsluáróður var í kringum kjarasamningana 2015.
„Sjáið hræðsluáróðursruglið sem vellur uppúr þessu fólki en takið eftir verkafólk er ætíð kennt um ef verðbólgan eykst, þrátt fyrir að þeir vita betur! Þetta er bull og blaður, en það er bara búið að segja þetta svo oft að allir trúa þessu. Takið eftir kæru félagar að frá desember 2002 til desember 2007 var 47% af hækkun verðbólgunnar keyrð áfram af hækkun á fasteignaverði í gegnum húsnæðisliðinn og frá desember 2012 til desember 2018 og takið aftur eftir 90% af verðbólgunni á þessum árum var keyrð áfram vegna húsnæðisliðarins, takið eftir 90%,“ segir Vilhjálmur.
Hann segir ekki hægt að kenna verkafólki um óstöðugleika. „Svo koma þessir snillingar fram og ætla enn og aftur að kenna verkafólk um óstöðugleika og ógna verðbólgumarkmiðum Seðlabankans þrátt fyrir að þessar staðreyndir liggi fyrir að húsnæðisliðurinn er að keyra verðbólguna áfram. Hugsið ykkur að ef það væri hægt að benda á verkalýðshreyfinguna og segja að þið báruð ábyrgð á 47% af verðbólgunni og eftir hrun 90% eins og hægt er að gera með því að benda á hvernig húsnæðisliðurinn hefur keyrt verðbólguna áfram, með skelfilegum afleiðingum fyrir heimilin. Ætla þessir lobbístar kannski að kenna íslensku verkafólki um að hér verða bankahrun?,“ spyr Vilhjálmur.
Hann segir að lokum tugir milljarða hafi verið færðir frá almenningi yfir til fjármálaelítunnar: „Takið núna eftir, frá árinu 2013 til ársloka 2018 hefur húsnæðisliðurinn í neysluvísitölunni fært frá heimilunum 172,5 milljarða. Já 172,5 milljarðar hafa verið færðir frá heimilunum yfir til fjármálaelítunnar bara vegna þess að við eina þjóðin í heiminum sem erum með húsnæðisliðin inni í lögum um vexti og verðtryggingu. Það er húsnæðisliðurinn sem keyrir verðbólguna áfram með skelfilegum afleiðingum fyrir almenning, en lobbíistunum er alveg sama um það það er miklu betra að kenna kjarasamningum verkafólks um verðbólguna! Nei kæru vinir ekki hlusta á þennan skefja-og miskunnarlausa hræðsluáróður lobbíistanna fá snobbelítu forréttindahópanna!“
