Á ellefta tímanum var manni í annarlegu ástandi vísað út af bráðamóttöku Landspítalans. Um svipað leiti var maður fluttur á bráðamóttökuna úr vesturborginni en sá þurfti aðstoð vegna fíkniefnaneyslu. Um klukkustund áður þurftu sjúkraflutningamenn að aðstoða annan mann í vesturborginni vegna lyfjamisnotkunar hans.
Á tólfta tímanum var stúlka flutt á bráðamóttöku Landspítalans úr austurborginni en talið er að stúlkunni hafi verið byrluð ólyfjan.
Um miðnætti lagðist einhver svo lágt að stela peningum úr söfnunarbauk Rauða krossins í verslunarmiðstöð í austurborginni. Þjófurinn komst undan á svörtu reiðhjóli.
Um klukkan hálf níu reyndi maður í annarlegu ástandi að komast inn í íbúð í miðborginni en hann var ekki velkominn þar. Honum var vísað á brott.
Á fimmta tímanum í nótt var tilkynnt um mann sem stal áfengi af Hótel Hilton og hljóp á brott með það.
Klukkan 20 í gærkvöldi tilkynnti ung kona um þjófnað á veski og síma í Hafnarfirði. Veskið og síminn fundust við Garðatorg. Síminn var skemmdur og búið var að taka 20.000 krónur úr veskinu og nota debetkortið fyrir tæplega 3.000 krónur.
Á tíunda tímanum í gærkvöldi varð umferðaróhapp á Kársnesbraut þegar tvö dekk bifreiðar sprungu þegar hún lenti í holu á malbikinu en hvassar brúnir eru á henni.
Á fjórða tímanum í nótt kom húsráðandi að manni sem var að reyna að komast inn í hús hans í Breiðholti um opinn glugga. Maðurinn lét sig hverfa hið snarasta þegar hann varð húsráðanda var.