„Það er mjög líklegt að það verði verkföll í mars mánuði,“ sagði Björn Snæbjörnsson, formaður Starfsgreinasambandsins, í samtali við Morgunútvarp Rásar 2 í morgun þar sem hann lýsti yfir vonbrigðum með skattaáform ríkisstjórnarinnar.
„Höfum alltaf sagt það frá upphafi að það kæmi frá stjórnvöldum gæti verið lykillinn að því að við getum náð saman kjarasamningum við Samtök atvinnulífsins,“ sagði Björn. Hann segir að verkalýðsforystan hafi lagt mikla áherslu á skattamál og að boðaðar lækkanir ríkisstjórnarinnar hafi verið langtum minni en vonir stóðu til.
„Þessar 6750 þúsund krónur sem þarna komu, voru langt undir því sem við höfðum væntingar til. Við vorum að vona það að þetta gæti verið í kringum 15 þúsund krónur.“
Hann segir að nú sé ljóst að aukin harka muni færast í baráttuna. „En þetta auðvitað bara þýðir það að þá þyngist bara róðurinn gagnvart SA vegna þess að þetta átti að vera til þess að liðka fyrir. Það gerir það ekki eins og við kannski vorum að vonast til.“
„Í okkar tillögum var náttúrulega gert ráð fyrir því að það yrði meiri skattalækkun en við komum líka með það að við vildum sjá hátekjuskatt inn í og vildum líka sjá fjármagnstekjuskatt hækkaðan. Þannig við vorum að koma með tillögur um hvernig við gætum fjármagnað þessa skattalækkun, sem við vorum að tala um, svo það er ekki hægt að segja um verkalýðshreyfinguna að hún hafi ekki komið líka með tillögur til að fjármagna, allavega að stærstum hluta, það sem við vorum að fara fram á handa okkar fólki.“
Nú þegar eru nokkur félög komin til ríkissáttasemjara og Björn býst við að enn fleiri munu vísa til sáttasemjara fyrir vikulok til að koma baráttunni í ákveðinn farveg. Hann segir að nú sé mikil hætta á verkföllum eftir mánaðamótin. Það sé félaganna að ákveða með hvaða hætti verkföllum fara fram, en nefndi hann að bæði væri hægt að fara í skæruverkföll ákveðinna hópa og algjör verkföll þar sem allir félagsmenn tiltekins félags, sem vinnu eftir samningi við SA, fari í verkfall. Einhver félög hafi síðan í haust kannað vilja félagsmanna til að taka þátt í aðgerðum á borð við verkfall og hafi niðurstöður til dæmis hjá Eflingu, Einingu og Iðju verið þær að stór meirihluti félagsmanna er tilbúinn í slíkar aðgerðir.
