„Ég er eiginlega bara að lognast út af,“ segir Davíð Karl Wium, bróðir Jóns Þrastar Jónssonar sem saknað hefur verið í Dublin á Írlandi í rúma viku, í samtali við Fréttablaðið í dag.

Leit að Jóni Þresti bar ekki árangur um helgina en að sögn Fréttablaðsins var Davíð þreyttur þegar hann ræddi við blaðamann. Davíð og fleiri hafa leitað að Jóni Þresti frá morgni til kvölds undanfarna daga en í dag mun fjölskyldan funda um stöðu mála með lögreglunni í borginni.

Davíð segir að fjölskyldan sé enn engu nær um hvarfið.

Í samtali við Morgunblaðið í dag segir Davíð að gengið hafi verið skipulega um hverfi borgarinnar í gær. Leitin sem slík hafi gengið ágætlega og leitarhópar komist yfir þau svæði sem þeir ætluðu sér.

„Við erum svo sem engu nær en við erum búin að dreifa myndum og tala við marga gangandi vegfarendur og aðra,“ segir Davíð en um 12-15 manns hafa leitað að Jóni frá því snemma á laugardag. Skipulögð leit mun halda áfram alla þessa viku en í framhaldinu verður staðan tekin á ný. „Við höldum áfram okkar striki þangað til eitthvað kemur í ljós,“ segir hann við Morgunblaðið.