Klukkan 22 í gærkvöldi voru tveir karlmenn á þrítugsaldri handteknir í hverfi 104 en þeir eru grunaðir um sölu og dreifingu fíkniefna. Þeir voru vistaðir í fangageymslu. Skömmu fyrir klukkan þrjú í nótt var tilkynnt um umferðaróhapp í hverfi 104. Bíl var ekið upp á umferðareyju og á skilti þar. Skemmdist bíllinn töluvert. Tveir aðilar sáust hverfa á brott frá vettvangi. Lögreglan fann þá skömmu síðar og handtók. Báðir eru þeir grunaðir um að hafa verið undir áhrifum fíkniefna. Bíllinn reyndist vera stolinn og í honum var þýfi úr ýmsum málum. Mennirnir voru vistaðir í fangageymslu.

Á tíunda tímanum í gærkvöldi var tilkynnt frá flugturninum í Reykjavík að leysigeisla hefði verið beint að flugvél sem var að lenda á Reykjavíkurflugvelli. Gerandinn fannst ekki.

Tveir ökumenn voru handteknir í gærkvöldi, í Breiðholti og Árbæjarhverfi, grunaðir um að vera undir áhrifum fíkniefna.