Talið er að sjúklingur á Vogi hafi kveikt í sér um helgina. Sjúklingurinn var fluttur í sjúkrabíl á slysadeild um helgina með brunasár.
Fréttablaðið greinir frá þessu. Valgerður Á. Rúnarsdóttir, forstjóri sjúkrahússins Vogs, vildi lítið tjá sig við blaðið. „Þetta er harmleikur fyrir einstaklinginn. Þetta er bara atvik sem verður. Get ekki tjáð mig um það frekar en önnur mál,“ segir Valgerður.
Lögregla varðist allra fregna um málið og engar upplýsingar var að fá frá Landspítalanum. Tveir einstaklingar hafa fyrirfarið sér á Vogi á þeim 40 árum sem sjúkrahúsið hefur verið starfrækt.
Samkvæmt heimildum DV hafði maðurinn látið ófriðlega í matsal á Vogi sem staðsett er á neðstu hæð spítalans. Lögregla og sjúkralið var svo kallað til og var rými þar sem sjúklingar á Vogi dvelja alla jafna við hinar ýmsu tómstundir lokað á meðan hugað var að manninum og öryggi hans tryggt. Þá voru viðbrögð starfsfólks á Vogi fagleg og komu í veg fyrir að verr færi.