Suðurlandsvegi hefur verið lokað milli Víkur í Mýrdal og Kirkjubæjarklausturs vegna áreksturs tveggja bíla. Þetta kemur fram í tilkynningu frá Lögreglunni á Suðurlandi. Samkvæmt tilkynningunni hefur fólk slasast alvarlega í árekstrinum og hefur verið óskað eftir þyrlu Landhelgisgæslunnar til að flytja hina slösuðu af vettvangi.
Búist er við að lokunin verði í gildi eitthvað fram eftir kvöldi. Uppfærð FB-færsla lögreglunnar á Suðurlandi um málið er svohljóðandi:
Búast má við að lokun Suðurlandsvegar vari í 2-3 klukkustundir vegna björgunarstarfa og rannsóknarvinnu á vettvangi.
Suðurlandsvegi hefur verið lokað milli Víkur í Mýrdal og Kirkjubæjarklausturs vegna áreksturs tveggja bifreiða við Hjörleifshöfða. Viðbragðsaðilar eru við vinnu á vettvangi. Ljóst er að talsverð slys eru á fólki. Óskað hefur verið eftir þyrlu Landhelgisgæslunnar til að flytja slasaða af vettvangi. Ökumenn og farþegar eru erlendir ferðamenn.
Frekari upplýsingar verða ekki veittar að sinni.
UPPFÆRT KL. 19:36
Allir hinir slösuðu, alls fjórir, hafa verið fluttir um borð í þyrlu Landhelgisgæslunnar sem er að taka á loft á vettvangi. Við tekur áframhaldandi vinna og rannsókn á vettvangi