„Fyrir nokkru gerði VÍS könnun á stefnuljósanotkun ökumanna sem beygðu af þjóðvegi 1 yfir á Biskupstungnabraut rétt vestan við Selfoss.
Mikill meirihluti ökumanna gaf stefnuljós eða 93%. Það sem var þó áberandi var hversu seint ökumenn gáfu stefnuljósin.“

Þetta segir í tilkynningu frá VÍS vegna fyrrnefndrar könnunar. Fylgst var með bílum sem óku í átt að Selfossi og voru að beygja inn á Biskupstungnabrautina. Niðurstöður leiddu í ljós að 60 prósent ökumanna gaf stefnuljós of seint, að er um leið og þeir beygðu inn á fráreinina eða eftir að komið var inn á hana.

„Stefnuljósin eru öryggistæki í umferðinni. Hafa þann tilgang að upplýsa ökumenn í kring ef á að breyta stefnu ökutækis. Það er því til lítils að setja stefnuljósið á þegar komið er inn á fráreinina. Það þarf að gera einhverjum metrum áður en komið er að henni,“ segir í tilkynningu frá Sigrúnu A. Þorsteinsdóttur, sérfræðingi í forvörnum hjá VÍS.

„Samkvæmt könnunum Samgöngustofu er skortur á stefnuljósanotkun annarra ökumanna það sem pirrar ökumenn mest í umferðinni. Við hvetjum alla til að líta í eigin barm og skoða hvort hægt sé að bæta stefnuljósanotkunina og draga með því t.d. úr líkum á aftanákeyrslum sem eru næst algengustu ökutjónin hjá VÍS.“