Deilur á Twitter urðu til þess að ung móðir var handtekin fyrir framan tíu ára gamla einhverfa dóttur sína og látin dúsa í fangaklefa í sjö klukkustundir. Þetta gerðist í Hertfordshire á Englandi. Þær Kate Scottow og Stephanie Hayden, sem er transkona, höfðu verið að kýta á Twitter og í þeim deilum kallaði Scottow Hayden karlmann. Sú síðarnefnda kærði skrif hennar.
Nokkru síðar komu þrír lögreglumenn á heimili Kate Scottow og handtóku hana. Þeir lögðu hald á snjallsíma hennar og fartölvu og lögðu fram réttartilskipun þar sem henni er meinað að kalla Stephanie Hayden karlmann.
Scottow var sökuð um „herferð og úthugsaða áreitni“ og að hafa notað tvo Twitter-reikninga til að áreita Hayden.
Í frétt Metro af málinu kemur fram að lögreglan í Hertfordshire segist taka „tilkynningar um fjandsamleg samskipti alvarlega.“
Scottow segist hafa verið handtekin fyrir framan tíu ára gamla einhverfa dóttur sína og 20 mánaða gamlan son sem sé á brjósti. Hún var látin sitja í sjö klukkustundir í varðhaldi áður en hún var yfirheyrð.
Uppfært:
Stephanie Hayden hefur nú stigið fram með yfirlýsingu þar sem fréttum breskra fjölmiðla af málinu er andmælt. Segist hún hafa kært konuna fyrir að standa á bakvið twitter aðgang sem byrjaði að dreifa persónuupplýsingum um Hayden án hennar samþykkis, þar á meðal upplýsingum um fjárhag hennar. Tilkynnti Hayden málið til lögreglu sem ákvað að grípa til aðgerða vegna þessa misferlis. – Beðist er velvirðingar á villandi fréttaflutningi um að Scottow hafi verið handtekin fyrir að kalla Hayden karlmann. Mun það ekki hafa verið ástæðan fyrir handtökunni.
PLEASE RT: Statement by me concerning the story in @MailOnline @DailyMailUK by @martinbeckford on 10 February 2019, concerning the arrest made by @HertsPolice on 1 December 2018 #transgender #journorequests #media #legal #law pic.twitter.com/RqtnlSQZTl
— Stephanie Hayden (@flyinglawyer73) February 12, 2019