Kolbrún Halldórsdóttir, þingmaður VG til margra ára og fyrrverandi umhverfisráðherra, segist gruna að atvikið á Kaffibarnum þar sem Snæbjörn Brynjarsson, fyrrverandi varaþingmaður Pírata, veittist að blaðamanninum Ernu Ýri Öldudóttur sé sviðsett.
Sjá einnig: Segir af sér varaþingmennsku vegna dónaskapar í garð blaðamanns
Þetta segir hún í athugasemd við Facebook-færslu Snæbjörn þar sem hann tilkynnir að hann hafi sagt af sér. Líkt og greint hefur verið frá þá ku Snæbjörn hafa hellti sér yfir Ernu Ýr Öldudóttur, blaðamann Viljans, í portinu á Kaffibarnum um helgina og segir Erna hann hafa hótað sér ofbeldi. Hún fullyrðir að Snæbjörn hafi lýst því yfir að hann hataði hana og vildi berja hana. Sjálfur kveðst Snæbjörn ekki hafa hótað henni ofbeldi en staðfestir að hann hafi lýst fyrirlitningu sinni á henni.
Kolbrún, sem er velkunn listaheiminum en hún starfaði lengi sem leikari, setur fram þá kenningu að atvikið hafi mögulega verið einhverskonar gjörningur. „Læðist ekki sá grunur að neinum hér að listamaðurinn SB hafi sett þessa atburðarás á svið? Slíkt er ekki óþekkt meðal listamanna sem hafa þá sýn að hlutverk listarinnar sé að benda á bresti í samfélaginu…? Nú þekki ég Snæbjörn ekki nema af góðu einu, hef aldrei séð hann koma fram af öðru en ljúfmennsku, því leyfi ég mér að læða þessari hugsun hér að…. Það kemur jú fyrir að listamenn framkvæma gjörninga sem erfitt er að greina sem hluta af listrænu framlagi þeirra til samfélagsins,“ segir Kolbrún.
Karl Sigurðsson, meðlimur Baggalúts og fyrrverandi borgarfulltrúi, virðist deila skoðun Kolbrúnar.
Kannski er ég bara kaldlyndur en mín fyrsta (ok önnur) hugsun þegar ég las um mál Snæbjörns og Ernu á KB var að þetta væri allt gjörningur.
— Karl Sigurðsson (@kallisig) February 11, 2019