Ekki liggur fyrir hvort farið verði fram á gæsluvarðhald eða farbann yfir mönnum sem handteknir voru í tengslum við andlát manns í Úlfarsárdal síðdegis í gær.
Margeir Sveinsson aðstoðaryfirlögregluþjónn hjá lögreglunni á höfuðborgarsvæðinu sagði í hádegisfréttum RÚV að málið væri rannsakað sem sakamál. Hann vildi þó ekkert gefa upp um hvort maðurinn hafi verið myrtur en yfirheyrslur hafa staðið yfir í morgun.
Fimm voru handteknir í tengslum við málið og eru þeir allir erlendir ríkisborgarar.
Maðurinn, sem einnig var erlendur ríkisborgari, féll niður af svölum fjölbýlishúss í Úlfarsárdal en tilkynning um málið barst lögreglu á þriðja tímanum í gær. Lögregla getur haldið mönnunum í sólarhring án þess að fara fram á gæsluvarðhald.