Lögreglan á Suðurnesjum stöðvaði ökumann og farþega í bíl hans um helgina en þeir eru grunaðir um að hafa ýmislegt óhreint í pokahorninu. Þannig er ökumaðurinn grunaður um ölvunar- og fíkniefnaakstur. Að auki er hann grunaður um þjófnað og fleira.

Í skeyti sem lögregla sendi frá sér kemur fram að farþeginn, sem var á leið í flug, reyndist vera með mikið magn af óopnuðum ilmvötnum og öðrum varningi í pakkningum sem grunur leikur á að séu þýfi. Einnig var hann með dýran merkjafatnað. Í fórum sínum hafði hann einnig íslenskt ökuskírteini sem eigandinn hafði tilkynnt stolið. Ekki gat maðurinn sýnt kvittanir fyrir varningnum sem hann var með.

Báðir mennirnir hafa komið við sögu lögreglu vegna ætlaðrar brotastarfsemi hér á landi.

Þá kærði lögreglan fáeina ökumenn fyrir of hraðan akstur um helgina.