Sanna Magdalena Mörtudóttir, borgarfulltrúi Sósíalistaflokksins, segir að borgarfulltrúar ættu sjálfir að greiða fyrir mat sem þeir fá á fundum borgarstjórnar.

Eins og greint hefur verið frá er borðað og drukkið fyrir 360 þúsund krónur á hverjum borgarstjórnarfundi. Heildarkostnaður Reykjavíkurborgar við 20 borgarstjórnarfundi sem haldnir voru frá júlí 2018 til júní 2019 er rúmar 17 milljónir króna. Eru fundirnir haldnir annan hvern þriðjudag.

Sitt sýnist hverjum um þetta en Sanna Magdalena bendir á að borgarfulltrúar hafi vel efni á að greiða sjálfir fyrir matinn. Hún segir á Facebook:

„Byrja fyrr, ljúka fundi fyrr, þá minnka líkur á því að við borðum kvöldmat á staðnum en fundir borgarstjórnar byrja klukkan 14:00 (í undantekningartilfellum byrja þeir fyrr, t.d. þegar við erum að afgreiða eitthvað stórt sem þarf tvær umræður í borgarstjórn) og við fundum langt fram eftir.

Svo finnst mér að það mætti rukka okkur borgarfulltrúa fyrir matinn, við höfum efni á því. Afhverju erum við ekki frekar að bjóða einhverjum á lágum launum sem sinnir mikilvægu starfi í borginni, í mat?“