Hátt í fjögur hundruð jarðskjálftar hafa mælst í hrinunni sem riðið hefur yfir Reykjanes síðan í gær.
Átta skjálftar af styrkleika 3 til 3,7 mældust í gær frá morgni til miðnættis. Skjálftarnir eru aðallega austast í Fagradalsfjalli en einnig hafa skjálftar mælst vestast í fjallinu.
Samkvæmt orðsendingu frá Veðurstofunni hafa borist allmargar tilkynningar frá fólki sem hefur orðið vart við skjálftana og „má gera ráð fyrir að þeir hafi allir fundist vel í nærliggjandi byggð, Grindavík og Keflavík.“
Þá er einnig bent á að jarðskjálftar séu algengir á svæðinu, en í lok júlí árið 2017 mældust um sex hundruð skjálftar á svæðinu yfir tveggja daga tímabil. Þá mældist stærsti skjálftinn 4 að stærð.