Ekkert fólksbílafæri var á Akureyri þegar bæjarbúar vöknuðu í morgun enda allt á kafi í snjó. Mikið snjóaði í óveðrinu sem gekk yfir svæðið í gærkvöldi og í nótt og sagði lögregla í morgun að aðalgötur væri jeppafærar en margar íbúðargötur hreinlega ófærar.
Myndirnar hér að neðan voru teknar af Einari Loga Vilhjálmssyni björgunarsveitarmanni í morgun og þar má sjá hversu mikill snjór er á götum bæjarins.
Á heimasíðu Akureyrarbæjar kemur fram að almenningssamgöngur liggi niðri í dag vegna ófærðar. Þá er búið að fella allt skólahald niður og þá er ljóst að ekki verður mögulegt að koma heimsendum mat til viðskiptavina. Röskun verður einnig á heimaþjónustu.
„Í þessum aðstæðum miðar snjómoksturinn fyrst og fremst að því að halda helstu stofnbrautum opnum og tengja hverfin. Byrjað er að keyra snjó af stofnbrautum og stærstu götum í þeirri viðleitni að vinna í haginn eins og hægt er í morgundaginn. Stefnt er að því að ryðja inni í hverfum á morgun. Ófært er í bænum fyrir fólksbíla og er vonast til að fólk sé ekki á ferli á götunum að óþörfu.“
Vonast er til að öll þjónusta verði komin í eðlilegt horf á morgun.