Íslenskar mæður vara við því að dæmdi barnaníðingurinn Böðvar Guðmundsson sé enn á ný kominn á kreik. Innan í það minnsta tveggja hópa á Facebook er fullyrt að hann sé virkur á Facebook að skoða myndir af börnum. Í sumar fjallaði DV um að hann væri að safna myndum af íslenskum börn og var það kært til lögreglu.
Í sumar var greint frá því að hann hafi sent fjölda kvenna skilaboð þar sem hann þóttist eiga barn. Það sem einkennir níð hans er að hann er með blæti fyrir bleyjum og biður iðulega um myndir af börnum í bleyjum. Í júlí birti hann mynd af fáklæddu barni, sem reyndist íslenskt, á Facebook og sagðist eiga það. Foreldrar þess barns sáu það og tilkynntu til lögreglu.
Nú er Böðvar sagður vera mættur aftur og farinn að læka myndir af börnum á Facebook. Móðir nokkur fullyrðir það í hópnum Mæðratips og skrifar:
„Vildi bara láta vita að Böðvar Guðmundsson, dæmdur barnaníðingur, er að skoða myndir af börnum á Facebook á tveimur mismunandi accounts sem þarf að blokka. Hann hefur sent mér skilaboð og beðið um mynd af barni hjá mér. Það var tilkynnt til lögregu og hann var dæmdur eftir að það gerðist. Í dag lækaði hann óvart mynd af dóttur minni sem kom upp um hann á nýjum account en samt undir sama nafni. Plís finnið hann blokkið bæði nöfnin. Veit að hann ýtti óvart á læk því tilkynning var til staðar en lækið horfið.“
Lýsing konunnar passar ágætlega við umfjöllun DV undanfarin ár. Árið 2014 var hann líkt og fyrr segir dæmdur fyrir barnaníð. Hann fékk einungis 9 mánaða fangelsisdóm. Í þeim dómi kemur fram að hann sé sérstaklega líklegur til að brjóta aftur af sér.
Þar kom fram að Böðvar sé greindur með ódæmigerða einhverfu og hafi sýnt afbrigðilega kynferðishegðun frá unga aldri, auk þess sem hann er sagður talinn í „hárri áhættu“ fyrir frekari kynferðislegri hegðun gegn börnum. Þá kemur fram að kynferðislegar hvatir hans séu áráttukenndar og tengist ungum börnum. Hann uppfylli greiningarviðmið fyrir barnagirnd og hafi greinilegt blæti fyrir bleyjum, snuðum og öðru, sem tengist ungabörnum.
DV fjallaði ítarlega um mál Böðvars árið 2015. Þá kom fram að hann setti sig í samband við mæður, líkt og hann virðist gera nú, og fór svo að ræða bleyjunotkun barnsins. Ef viðkomandi kona hélt áfram að ræða við hann þá bauðst hann til að passa barnið.