„Ef spáin rætist þá er þetta bara rétt að byrja,“ segir Bragi Þór Valsson, íbúi á Hólmavík á Ströndum, í samtali við DV. Bragi birti myndbönd á Twitter sem sýna glögglega að veðrið hefur versnað mjög síðan í morgun.
Fyrra myndbandið hér að neðan var tekið klukkan 11:45 og sýnir það að talsverður vindur var í þorpinu. Klukkutíma síðar var skyggnið nánast ekki orðið neitt.
„Meðan maður getur þá ætla ég að stökkva út. Þetta er orðið svona tuttugu present verra núna en það var áðan,“ segir hann.
Bragi er tiltölulega nýfluttur til Hólmavíkur og segir hann að eflaust séu flestir, ef ekki allir, innandyra núna. Strax í gærkvöldi var tekin ákvörðun um að fella niður skólahald og segir Bragi að bæjarbúar séu mjög samstíga nú þegar veðurofsinn nálgast.
Stormurinn sem er á vörum flestra Íslendinga í dag skellir einna verst á Ströndum og Vestfjörðum. Veðurstofan hefur gefið út rauða viðvörun á svæðinu, einum landshluta. Á vef Veðurstofu er ástandinu lýst svo:
„Spáð er norðan ofsaveðri eða fárviðri (25 til 33 m/s) með mikilli snjókomu og skafrenningi. Búast má við víðtækum samgöngutruflunum og tjóni og/eða slysum ef aðgát er ekki höfð. Ekkert ferðaveður er á meðan viðvörunin er í gildi. Búast má við hækkandi sjávarstöðu vegna áhlaðanda, allt að 10 m. ölduhæð og líkur á að smábátar geta laskast eða losnað frá bryggju. Fólki er bent á að fylgjast vel með veðurspám og viðvörunum.“
[videopress EOPFzC8u]