„Bara ef Hafnarfjarðarvegur væri alltaf svona klukkan 17,“ segir íbúi í Hafnarfirði sem tók þessa mynd um fimmleytið í dag. Á þeim tíma er vanalega hægfara bílalest.
Götur borgarinnar eru nú að mestu mannlaustar og bíllausar. Flest fólk er löngu farið heim úr vinnu og hefur lokað að sér í híbýlum sínum. Veðurofsinn hefur þó ekki náð hámarki. Veðrið er mun verra víða norðanlands og á Vestfjörðum. Rafmagnslaust er á Sauðárkróki og þakplötur hafa fokið á Ólafsfirði svo dæmi séu nefnd um áhrif veðursins. Hefur verið gefin út rauð viðvörun vegna óveðursins á þessum svæðum en appelsínugul viðvörun gildir fyrir höfuðborgarsvæðið.
Veitingastaðirnir KFC, Pizza Hut og Taco Bell, sem eru í eigu sömu samsteypunnar, sendu frá sér sérstaka fréttatilkynningu um að staðirnir myndu loka kl. 17 í dag vegna óveðursins. Ekki hafa þó allir staðir lokað. Umræður um lokun veitingastaða í dag spunnust í Facebook-hópnum Matartips þar sem Sigmar Vilhjálmsson, Simmi Vill, gagnrýndi þá eigendur veitingastaða sem ekki lokuðu snemma í dag og spurði sig um áhuga þeirra á velferð starfsfólksins. Ekki voru allir sammála Simma þar og sumir benda á að veðrið verði ekki svo ýkja slæmt í Reykjavík.
Helsti munurinn á veðurfarinu sunnanlands annars vegar og á Vestfjörðurm og Norðurlandi hins vegar er að á síðarnefndu svæðunum er mun meiri úrkoma í illviðrinu auk þess sem vindhraði er heldur meiri. Gífurlegur skafrenningur er víða á þessum svæðum núna.
Engar fréttir hafa borist enn af skemmdum, rafmagnsleysi eða annarri óáran vegna veðursins í Reykjavík en við fylgjumst með ástandinu í kvöld en veður á enn eftir að versna.