Arnór Sveinn Aðalsteinsson, leikmaður KR segir sögu sína á RÚV þar sem hann fer yfir það hvernig hann fór að breyta matarræðinu til að verða betri knattspyrnumaður. Hann var frábær með liðinu í ár, þegar KR varð Íslandsmeistari.
Arnór hætti að neyta þess sem flokka má sem óhollt, sykur og fleira í þeim dúr. Að lokum gerðist hann vegan, eða grænkeri. Það gerði Arnór gott, að hans mati til að byrja með.
„Mér fannst hugsunin hjá mér skýrari og ég varð fljótari að jafna mig á öllu. Ég veit ekki hvort ég tengdi það við einhverskonar bólguminnkandi áhrif sem að maður finnur oft þegar maður tekur út þessar óhollu vörur sem eru oft mjög bólgumyndandi. En í kjölfarið á ég einhvern veginn erfitt með að halda mér í þyngd og þarf að borða rosalega mikið til að viðhalda keppnisþyngd af því að maður er náttúrulega í íþróttum,“ segir Arnór við RÚV
Hann fór hins vegar að léttast meira en hann mátti við, og fór sökum þess að borða kjöt aftur.
„Ég fer í frí með Söndru, kærustunni minni, og kem til baka svona átta kílóum léttari – og ég mátti ekkert við því. Þá fer ég að hugsa að ég þurfti að finna eitthvað sem að henti mér aðeins betur. Þá byrjaði ég að huga að því að byrja aftur að borða hreint kjöt.“
„Í grófum dráttum hefur það í rauninni gert það að verkum að ég get áfram stundað fótbolta. Af því að ég hefði ekkert getað haldið áfram á hinn veginn, það var bara ekki hægt. Ég hefði ekki haft ekki áhuga á því. Ég hafði ekki líkamlega getu í að stunda þetta. Í þessu heildarsamhengi sem lífstíllinn minn er núna, bjargaði hann í rauninni ferlinum,“ segir Arnór.