Kona var í Héraðsdómi Reykjavíkur í dag sakfelld fyrir að hafa hrækt framan í lögregluþjón við skyldustörf á lögreglustöðinni við Hverfisgötu. Atvikið átti sér stað aðfararnótt sunnudags í byrjun mars á þessu ári.
Konan var með þessu athæfi talin hafa brotið gegn 106. grein almennra hegningarlaga þar sem kveðið er á um afbrot gegn valdstjórninni: „Hver, sem ræðst með ofbeldi eða hótunum um ofbeldi á opinberan starfsmann, þegar hann er að gegna skyldustarfi sínu eða út af því, og eins hver sá, sem á sama hátt leitast við að hindra framkvæmd slíks starfa eða neyða starfsmanninn til þess að framkvæma einhverja athöfn í embætti sínu eða sýslan, skal sæta … 1) fangelsi allt að 6 árum,“ segir þar.
Konan játaði afbrot sitt skýlaust og var dæmd í 30 daga skilorðsbundið fangelsi. Hún var dæmd til að greiða verjanda sínum 130.000 krónur í málsvarnarlaun.