„Mér líður ekki vel eins og er og er á leiðinni á spítala,“ segir albanska konan í samtali við Stundina en hún lenti í heimalandinu seint í gærkvöldi. Konan er komin 36 vikur á leið en læknar á mæðradeild Landspítalans höfðu mælt gegn því að hún myndi fljúga í þessu ástandi. Þrátt fyrir það var hún flutt úr landi með flugi í lögreglufylgd.
Í umfjöllun Stundarinnar kemur fram að albanska konan hafi átt sitt fyrra barn með keisaraskurði á 36. viku meðgöngu. „Ég var að hringja til þess að reyna að ná sambandi við hana vegna þess að ég er með smá áhyggjur. Ég er bara að reyna að fá fréttir,“ sagði Morgane þegar hún talaði við Stundina í gær.
Þá kemur einnig fram að Morgane hafi ítrekað reynt að ná í albönsku konunna yfir daginn en allt kom fyrir ekki. Eftir að hún hafði hringt töluvert oft í síma konunnar þá svaraði fyrrverandi nágranni hennar símanum. Nágranninn sagði við Morgane að albanska konan hafði skilið símann sinn eftir. Átti Morgane erfitt með að skilja af hverju hún hafi ekki tekið símann með sér. „Hún skildi símann sinn eftir á hótelinu, sem er skrítið, þar sem hún er með fullt af myndum inni í símanum,“ sagði Morgane.