Nýtt íslenskt lággjaldaflugfélag sem sett hefur verið á laggirnar heitir Play. Þetta kom fram í máli Arnars Más Magnússonar, forstjóra umrædds félags, á blaðamannafundi sem nú stendur yfir í Perlunni.
Til að byrja með verður félagið með tvær Airbus A320 vélar á sínum snærum en með vorinu verði vélunum fjölgað í sex. Fyrst verður flogið til Evrópu en eftir því vélunum fjölgar verður flogið til Norður-Ameríku.
Vinnuheitið á hinu nýja félagi var WAB, sem stendur fyrir We Are Back, eða Við erum komin aftur, og vísaði til WOW-air sem fór í þrot í vor. Formlegt nafn félagsins var hins vegar kynnt í morgun og heitir félagið sem fyrr segir Play.
„Það sem við ætlum að leggja mikla áherslu á er stundvísi. Við ætlum að vera á áætlun,“ sagði Arnar sem bætti við að markmiðið væri einnig að leggja áherslu á einfaldleika. Þannig verður aðeins einni flugvélategund flogið og þá verður áhersla lögð á að bjóða upp á hagstætt verð frá fyrsta degi.
Vélarnar sem flogið verður eru Airbus A320 og sagði Arnar að þessar vélar henti vel fyrir flug til og frá Íslandi. Þær séu sparneytnar og geta auk þess boðið upp á fraktflutninga.
Á fundinum kom fram að mikil flugreynsla væri hjá starfsmönnum Play, ekki bara frá WOW heldur Atlanta og öðrum félögum.
Þá kom fram í máli Arnars að það hafi verið verk að vinna að fjármögnun félagsins. Það hafi tekist en lögð hafi verið áhersla á fjármögnun til lengri tíma. „Það hefur okkur tekist og það er í samvinnu við breskan fagfjárfestasjóð og það er gaman að segja frá því að Íslensk Verðbréf komu að þessu.“
80% fjármagnsins kemur erlendis frá en 20% frá Íslandi.
„Við erum ekki 100% tilbúin en erum núna á lokastigum flugrekstrarleyfisins,“ sagði Arnar en á fundinum kom fram að bókunarvélin væri tilbúin og heimasíða færi í loftið von bráðar. Arnar sagði að félagið væri ekki tilbúið að segja hvert það myndi fljúga en tók þó fram að flogið yrði bæði til Ameríku og Evrópu.
Arnar sagði að til að byrja með yrði flogið til sex áfangastaða í Evrópu, helstu borga álfunnar og svo hugsanlega til sólarstaða. „Með vorinu verður fjórum vélum bætt við og þá ætlum við að hefja flug til Norður-Ameríku.“
Eins og að framan greinir er ekki komið á hreint hvenær fyrsta flugið verður farið, en það mun koma í ljós þegar opnað verður fyrir sölu á miðum. Arnar sagði að félagið væri þegar byrjað að leita að starfsfólki og fjölmörg störf séu í boði – laun verði greidd samkvæmt íslenskum kjarasamningum enda verða höfuðstöðvar félagsins hér á landi, nánar tiltekið við Reykjavíkurveg í Hafnarfirði.
