Þjófnaður úr fataverslun var tilkynntur lögreglunni á Suðurnesjum í vikunni. Sást til manns sem hafði stungið inn á sig fatnaði í versluninni og gengið út án þess að borga. Vitað er til þess að viðkomandi náði að taka með sér fatnað sem er samtals að verðmæti 12 þúsund krónur en ekki liggur fyrir hvort hann hafði meiri verðmæti á brott með sér. Lögregla rannsakar málið.
Þetta kemur fram í tilkynningu frá Lögreglunni á Suðurnesjum. Segir þar einnig að óvenjumörg umferðaróhöpp hafi verið í umdæminu í vikunni en engin alvarleg slys á fólki. Má þar nefna að ökumaður sem var að aka Byggðaveg missti skyndilega stjórn á bíl sínum með þeim afleiðingum að hann byrjaði að snúast og stöðvaðist á ljósastaur.
Annar ökumaður blindaðist af sól sem er lágt á lofti þessa dagana og ók á bíl sem verið var að bakka út úr stæði á Njarðvíkurbraut. Bíllinn sem ekið var á lenti á þriðja bílnum sem var kyrrstæður og mannlaus.