Edgar Guðmundsson verkfræðingur lést í gær á líknardeild Landspítalans. Edgar var 79 ára gamall en hann var fæddur 16. október árið 1940.
Edgar var merkur verkfræðingur og vann meðal annars að framþróun í timburframleiðslu og annari nýsköpun í byggingariðnaði. Meðal þess sem Edgar þróaði var svonefnt mátskerfi, sem hann þróaði í samvinnu við arkitektinn Ólaf Jóhann Ásmundsson. Í mátskerfinu gengur fjöður inn í nót á plötuköntum. Plötunum er síðan raðað saman. (Sjá Greinasafn Morgunblaðsins)
Edgar rannsakaði einnig orkumál mikið og var ráðgjafi stjórnar Hitaveitu Akraness.
Meðal fjölmargra annarra þróunarverkefna sem Edgar sinnti var hönnun og framleiðsla einingarhúsa sem komu á markaðinn á áttunda áratugnum.
Eftirlifandi eiginkona Edgars er Hanna Eiríksdóttir. Sonur Edgars, Guðmundur Edgarsson, skrifaði eftirfarandi minningarorð um Edgar á Facebook-síðu sína og veitti DV-góðfúslega leyfi til birtingar þeirra:
Faðir minn, Edgar Guðmundsson verkfræðingur, lést í gær á líknardeild Landsspítalans, 79 ára að aldri, eftir nokkurra ára baráttu við lifrakrabbamein.
Hann var mér ætíð stoð og stytta í lífinu, blíður og skilningsríkur faðir sem ávallt var hægt að leita til, hvað sem á gekk. Ég minnist ekki eins atviks úr lífi okkar þar sem skuggi féll á gagnkvæmt traust okkar á milli eða ástríkrar vináttu. Ég mun sakna hans, ætíð þakklátur fyrir allt sem hann hefur gefið mér.
DV sendir öllum aðstandendum og vinum Edgars Guðmundssonar innilegar samúðarkveðjur.