Fréttablaðið skýrir frá þessu. Haft er eftir Ingibjörgu Karlsdóttur, félagsráðgjafa hjá BUGL, að vel þjálfaðir starfsmenn séu að hverfa til annarra betur launaðra starfa þar sem BUGL sé ekki samkeppnishæft eða eftirsóknarverður vinnustaður vegna umtalsvert lakari kjara en eru í boði annarsstaðar hjá ríki og sveitarfélögum.
Dæmi eru um að fagfólki hafi staðið einfaldari störf hjá heilsugæslustöðvum og félagsþjónustu sveitarfélaga til boða með 150 til 200 þúsund króna hærri laun á mánuði.
510 börn njóta nú þjónustu hjá BUGL en þessi hópur er viðkvæmur og glímir við fjölþættan vanda. Komum á göngudeild hefur fjölgað töluvert á milli ára en á síðasta ári fjölgaði komum um 16 prósent.
Haft er eftir Guðrúnu Bryndísi Guðmundsdóttur, yfirlækni á BUGL, að útlit sé fyrir að komum muni halda áfram að fjölga á þessu ári eða um tæplega 15 prósent.