Lögreglumenn handtóku ökumann um tvö leytið í nótt en sá virti ekki merki lögreglu um að stöðva bifreið sína. Lögregla gaf ökumanninum merki um að stöðva þegar bifreið hans var á Bústaðavegi við Flugvallaveg. Hugðist lögregla kanna ástand ökumannsins. Í stað þess að stöðva gaf ökumaðurinn í og var ökuhraði bifreiðarinnar mældur allt að 120 kílómetrar á klukkustund.
Bifreiðin var síðan stöðvuð við Sprengisand þar sem ökumaðurinn var handtekinn. Ökumaðurinn er grunaður um akstur undir áhrifum áfengis og fíknefna, fara ekki að fyrirmælum lögreglu og of hraðan akstur svo eitthvað sé nefnt. Ökumanninum var sleppt að lokinni upplýsinga- og sýnatöku.
Þessu til viðbótar voru fimm ökumenn stöðvaðir vegna gruns um akstur undir áhrifum áfengis eða fíkniefna.